raz-e-darun-e-astin kashmakash-e-bayan men tha
aag abhi nafas men thi shoala abhi zaban men tha
vo jo kahin tha vo bhi main aur jo nahin tha vo bhi main
aap hi tha zamin par aap hi asman men tha
lams-e-sada-e-saz ne zakhm nihal kar diye
ye to vahi hunar hai jo dast-e-tabib-e-jan men tha
khvab-e-ziyan hain umr ka khvab hain hasil-e-hayat
is ka bhi tha yaqin mujhe vo bhi mire guman men tha
khanjar o dashna o sinan ye to bahane hain miyan
aap na sharmsar hon zakhm sirisht-e-jan men tha
hadd-e-guman se ek shakhs duur kahin chala gaya
main bhi vahin chala gaya main bhi guzishtagan men tha
Leave a Reply