safed-posh darindon ne gul khilae the
zamin surkh hui sabz karne aae the
samajh liya tha jinhen main ne raushni ka safir
vo astin men khanjar chhupa ke laae the
musafiron ko ghani chhanv le ke baith gai
darakht raah ke donon taraf lagae the
mujhe bhi charon taraf tishnagi ne daudaya
miri nigah pe ab-e-ravan ke saae the
mujhe ghurur hai main doston ki neki huun
unhen khushi hai ki dariya men daal aae the
mire aziiz the vo qabr khod ke rakh di
mujhe jo de gae mitti vo sab parae the
hava to apna qarina badal nahin sakti
charagh aap ne kis zoam men jalae the
Leave a Reply