Afroz Rizvi
divar ke hue to kabhi dar ke ho gae
mere charagh bad-e-sitamgar ke ho gae
main is tarah se kucha-e-vahshat ki ho gai
mallah jis tarah se samundar ke ho gae
us ke dil-o-nigah ka kis se karen gila
us ke dil-o-nigah to patthar ke ho gae
jo mujh ko chahte the kabhi sar se paanv tak
dushman na jaane kyuun vo mire sar ke ho gae
jo tere pairahan ki mahak le ke aai thi
ham to usi hava-e-moattar ke ho gae
main teri khushbuon ki talabgar jab hui
tere chaman ke phuul bhi patthar ke ho gae
ye kaisi gardishen hain ki arz-o-sama pe aaj
shams-o-qamar charagh barabar ke ho gae
kheme jale charagh bujhe aur is ke baad
nezon pe sar-buland bahattar ke ho gae
barish ko badalon ko samundar ko chhod kar
‘afroz’ ham to saqi-e-kausar ke ho gae
Leave a Reply