DhunDte DhunDte ḳhud ko main kahan ja nikla
ek parda jo uTha dusra parda nikla
manzar-e-zist sarasar tah-o-bala nikla
ghaur se dekha to har shaḳhs tamasha nikla
ek hi rang ka gham-ḳhana-e-duniya nikla
gham-e-janan bhi gham-e-zist ka saaya nikla
is rah-e-zist ko ham ajnabi samjhe the magar
jo bhi patthar mila barson ka shanasa nikla
aarzu hasrat aur ummid shikayat aansu
ik tira zikr tha aur biich men kya kya nikla
ghar se nikle the ki a.ina dikha.en sab ko
lekin har aks men apna hi sarapa nikla
kyuun na ham bhi karen us naqsh-e-kaf-e-pa ki talash
sho.ala-e-tur bhi to ek bahana nikla
ji men tha baiTh ke kuchh apni kahenge ‘sarvar’
tu bhi kam-baḳht zamane ka sataya nikla
Leave a Reply