Saleem Faraz
har-chand tire gham ka sahara bhi nahin hai
jiine ke alava koi chara bhi nahin hai
har roz kiye jaati hai ye ziist taqaze
kya qarz tha jo ham ne utara bhi nahin hai
pahle to ye maujen bhi himayat men khaḌi thiin
ab mera madad-gar kinara bhi nahin hai
jaata bhi nahin chhoḌ ke vo mujh ko akela
aur saath mira us ko gavara bhi nahin hai
kuchh apne muqaddar ko bigaḌa bhi hamin ne
kuchh apne muafiq ye sitara bhi nahin hai
hoti thi jise dekh ke sarshar tabi.at
ankhon men vo sarsabz nazara bhi nahin hai
ye baat alag jiit ke asar nahin hain
is marka-e-jan ko vo haara bhi nahin hai
har koi ‘salim’ us ka muḳhalif hai jahan men
aur koi ḳhilaf us ke saf-ara bhi nahin hai
Leave a Reply