Obaidur Rahman
baghair soche hue arz haal karte rahe
javab kuchh na mila ham saval karte rahe
kabhi to Duube nadi men magar kabhi ham ne
samundaron ko uchhala kamal karte rahe
isi se naam mila hai isi se izzat bhi
jo kaam sahal bahut the muhal karte rahe
khaḌe rahe yuun hi ankhon men ashk jaari kiye
har ek lamha-e-shab la-zaval karte rahe
kabhi kisi ki mohabbat ka dam bhi bhar aa.e
ye ek kaam bhi ham ḳhal-ḳhal karte rahe
to un ko ham se tha bas ek ye ta.alluq ḳhaas
miri qaba se lahu apna laal karte rahe
Leave a Reply