Jun Nikhat-E-Gul Jumbish Hai Ji Ka Nikal Jaana

juun nikhat-e-gul jumbish hai ji ka nikal jaana

ai bad-e-saba meri karvat to badal jaana

pa-laghz-e-mohabbat se mushkil hai sambhal jaana

us rukh ki safai par is dil ka bahal jaana

siine men jo dil tadpa dhar hi to diya dekha

phir bhuul gaya kaisa main haath ka phal jaana

itna to na ghabrao rahat yahin farmao

ghar men mire rah jaao aaj aur bhi kal jaana

ai dil vo jo yaan aaya kya kya hamen tarsaya

tu ne kahin sikhlaya qaabu se nikal jaana

kya aise se daava ho mahshar men ki main ne to

nazzara-e-qatil ko ehsan-e-ajal jaana

hai zulm karam jitna tha farq pada kitna

mushkil hai mizaj itna ik baar badal jaana

huron ki sana-khvani vaaiz yuun hi kab maani

le aa ki hai nadani baton men bahal jaana

ishq un ki bala jaane ashiq hon to pahchane

lo mujh ko atibba ne saude ka khalal jaana

kya baten banata hai vo jaan jalata hai

paani men dikhata hai kafur ka jal jaana

matlab hai ki vaslat men hai bul-havas aafat men

is garmi-e-sohbat men ai dil na pighal jaana

dam lene ki taqat hai bimar-e-mohabbat hai

itna bhi ghanimat hai ‘momin’ ka sambhal jaana

Leave a Comment