Asad Badayuni
dayar-e-ishq ki sham.en jala to sakte hain
ḳhushi mile na mile muskura to sakte hain
hamesha vasl mayassar ho ye zaruri nahin
do ek din ko tire paas aa to sakte hain
jo raz-e-ishq hai un ko chhupa.enge lekin
jo dagh-e-ishq hain sab ko dikha to sakte hain
ham imtihan men nakam huun ye ranj nahin
isi men ḳhush hain ki vo aazma to sakte hain
nasim-e-sub.h ke jhonke hain ḳhush-gavar magar
kabhi kabhi ye dilon ko dikha to sakte hain
yahi bahut hai ki is ḳhar-zar-e-duniya men
tujhe ham apne gale se laga to sakte hain
Leave a Reply