Ajib Us Se Bhi Rishta Hai Kya Kiya Jae

ajiib us se bhī rishta hai kyā kiyā jaa.e

vo sirf ḳhvāboñ meñ miltā hai kyā kiyā jaa.e

jahāñ jahāñ tere milne kā hai gumān vahāñ

na zindagī hai na rāsta hai kyā kiyā jaa.e

ġhalat nahīñ mujhe marne kā mashvara us kā

vo merā dard samajhtā hai kyā kiyā jaa.e

kisī pe ab kisī ġham kā asar nahīñ hotā

magar ye dil hai ki dukhtā hai kyā kiyā jaa.e

kamī na kī thī tavajjoh meñ aap ne lekin

hamārā zaḳhm hī gahrā hai kyā kiyā jaa.e

vo merī jaan kā dushman sahī magar yaaro

mire liye vahī achchhā hai kyā kiyā jaa.e

Leave a Comment