Poet
duniya men ibadat ko tiri aae hue hain
par husn-e-butan dekh ke ghabrae hue hain
afsos ibadat na tiri ho saki ham se
gardan nahin uthti hai ki sharmae hue hain
ilzam nahin tuur jo surma hua jal kar
muusa bhi tajalli se to sharmae hue hain
main barhaman o shaikh ki takrar se samjha
paaya nahin us yaar ko jhunjhlae hue hain
kaabe se na raghbat hamen ne dair ki khvahish
ham khana-e-dil men jo use paae hue hain
hai kaun si ja ho jo tire jalve se khali
mazmun ham ab dil men yahi laae hue hain
zillat ke kharidar hue hirs ke bande
hajat ke liye haath jo phailae hue hain
jis qaum men dekha to tajassus tira paaya
maabad tire har qaum men thahrae hue hain
‘bahram’ ghazal aur bhi ik un ko suna de
mushtaq tiri bazm men sab aae hue hain
Leave a Reply