ta.amir-e-zindagi ko numayan kiya gaya
taḳhrib-e-ka.enat ka saman kiya gaya
gulshan ki shaḳh shaḳh ko viran kiya gaya
yuun bhi ilaj-e-tangi-e-daman kiya gaya
kho.e ho.uun pe teri nazar ki navazishen
a.ina de ke aur bhi hairan kiya gaya
avargi-e-zulf se asudgi mili
asudgi mili ki pareshan kiya gaya
vo ḳhush-nasib huun ki gham-e-iltifat se
mere gham-e-hayat ka darman kiya gaya
tanha.iyan bichha ke jahan-e-ḳharab men
mere liye nigah ka saman kiya gaya
phaila ke be-sabati-e-alam ki dastan
mujh par haram kaif-e-baharan kiya gaya
bhaḌka ke atish-e-ruḳh-e-janan ki aarzu
mujh ko rahin-e-atish-e-dauran kiya gaya
naumidi-e-talab pe chaḌha ke talab ka rang
ummid-e-did-e-dost ko arzan kiya gaya
ye bhi karam ki mujh ko shaban-e-siyah men
mamur-e-dil-navazi-e-hijran kiya gaya
jam.iyyat-e-jamal ka husn-e-kamal dekh
aḳhir yahi hua ki pareshan kiya gaya
de kar chaman ko bahar-o-ḳhizan ka rang
mere ḳhayal-o-ḳhvab pe ehsan kiya gaya
aa aur ka.enat ke phulon ki daad de
jin se tira jamal numayan kiya gaya
Leave a Reply