phuul mahka.e the main ne shadmani ke liye
har nafs ab mar rahi hon zindagani ke liye
kis tarah kaliyan khilen aur kis tarah mahken gulab
tang ho jaa.e zamin jab baghbani ke liye
sabr ki had se guzar jaati hai sahraon ki pyaas
ḳhushk ho jaata hai jab dariya hi paani ke liye
us ki chahat us ki qurbat us ki baten us ki yaad
kitne unvan mil ga.e hain ik kahani ke liye
us liye ham ko nahin baḳhsha gaya koi makan
kyunki ham paida hue the be-makani ke liye
talḳhiyon se vaqt ki jo ho ga.e nashtar-sifat
lab the vo mash.hur apni ḳhush-bayani ke liye
vaqt ke jalte hue suraj ki tapti dhuup men
is ki yadon ke shajar hain sa.ebani ke liye
sha.iri ki barishon men bhige bhige tere lab
rab ka hai in.aam ‘mina’ be-zabani ke liye
Leave a Reply