hisar-e-jism se azad hone vaala huun
kisi ko pa ke kisi shai ko khone vaala huun
jo miT ga.e hain vo aqdar jam.a karne hain
bikhar ga.e hain jo moti pirone vaala huun
hai qaht-e-ab ka manzar to char-su lekin
main apni chashm-e-haqiqat bhigone vaala huun
main apne dard ke tufan daba.e siine men
hansa chuka huun zamane ko rone vaala huun
ye janta huun phir ik baar koi kaTega
vafa ki fasl phir ik baar bone vaala huun
ye jaan kar bhi nadi par nazar Tika.e huun
sarab ban ke sarabon men khone vaala huun
hazar din men main suraj bana phirun phir bhi
siyah raat ke maqtal men khone vaala huun
thapak thapak ke sulate hain is liye hi ‘nihal’
ki ḳhvab jaan ga.e hain main sone vaala huun
Leave a Reply