kis ki tasvir se a.ina Darata hai mujhe
kaun ye mujh sa hai ankhen jo dikhata hai mujhe
nit-na.e sahil-o-amvaj dikhata hai mujhe
ik samundar hai ki har-lahza bulata hai mujhe
hai nihan-ḳhana-e-gham us ki hansi ke pichhe
hansta rahta hai vo ḳhud aur rulata hai mujhe
rat-bhar koh-e-nida se mujhe deta hai sada
sub.h hote hi bulandi se girata hai mujhe
ashk ye aur kisi ka hai sar-e-sham-e-umid
meri ankhon men utar kar jo rulata hai mujhe
kise achchha kahun ab kis ko bura ai ‘betab’
har koi apne hi jaisa nazar aata hai mujhe
Leave a Reply