vo dard-e-ishq jis ko hasil-e-iman bhi kahte hain
siyah-baḳhton men us ko gardish-e-dauran bhi kahte hain
jo aghosh-e-haya men ek dil-avez nashtar hai
isi mauj-e-nazar ko gulshan-e-ḳhandan bhi kahte hain
hijabat-e-nazar jalvon ki bebaki se kya uTThen
mohabbat ki nazar ko dida-e-hairan bhi kahte hain
na khulva.en zaban achchha yahi hai hazrat-e-zahid
ki is tark-e-talab ko hasrat-e-isyan bhi kahte hain
kisi ke vaste sarmaya-e-duniya-o-din Thahren
vahi nazren jinhen gharat-gar-e-iman bhi kahte hain
jo dil mamura-e-sad-hasrat-o-yas-o-tamanna hai
ta.ajjub hai usi ko ḳhana-e-viran bhi kahte hain
ghalat-andaz si nazren tabassum be-niyazana
taghaful-keshiyon ko davat-e-arman bhi kahte hain
jahan-e-ab-o-gil ko jis ne zauq-e-zindagi baḳhsha
use ai hazrat-e-naseh dil-e-nadan bhi kahte hain
hai jis ke dam se duniya-e-mohabbat jannat-e-arman
usi jan-e-tarab ko fitna-e-dauran bhi kahte hain
Leave a Reply