jab se tumhari ankhen aalam ko bha.iyan hain
tab se jahan men tum ne dhumen macha.iyan hain
jaur-o-jafa o mehnat mehr-o-vafa-o-ulfat
tum kyuun baḌha.iyan hain aur kyuun ghaTa.iyan hain
mil mil ke ruuTh jaana aur ruuTh ruuTh milna
ye kya ḳharabiyan hain kya jag-hansa.iyan hain
Tuk Tuk sarak sarak kar aa baiThna baghal men
kya achpala.iyan hain aur kya DhiTa.iyan hain
zulfon ka bil banate ankhen chura ke chalna
kya kam-nigahiyan hain kya kaj-ada.iyan hain
a.ina ru-ba-ru rakh aur apni saj banana
kya ḳhud-pasandiyan hain kya ḳhud-numa.iyan hain
anchal uTha ke tum ne jo Dhank liin ye chhatiyan
kis ko dikha.iyan hain kis se chupa.iyan hain
tum men jo shoḳhiyan hain aur chanchala.iyan hain
kin ne sikha.iyan hain kin ne bata.iyan hain
‘hatim’ ke bin ishara sach kah ye chashm-o-abru
kis se laḌa.iyan hain kis par chaḌha.iyan hain
Leave a Reply