Main Wahm Bechta Hun Waswase Banata Hun

maiñ vahm bechtā huuñ vasvase banātā huuñ

sitāre dekhtā huuñ zā.iche banātā huuñ

garāñ hai itnā to kyoñ vaqt ho mujhe darkār

maze se baiThā huā bulbule banātā huuñ

musāfiroñ kā mire ghar hujūm rahtā hai

maiñ pyaas bāñTtā huuñ aable banātā huuñ

ḳharīd laatā huuñ pahle tire visāl ke ḳhvāb

phir un se apne liye rat-jage banātā huuñ

yahī nahīñ ki zamīneñ mirī achhūtī haiñ

maiñ āsmān bhī apne liye banātā huuñ

Leave a Comment