Shahryar
andhi ki zad men sham-e-tamanna jalai jaae
jis tarah bhi ho laaj junun ki bachai jaae
be-ab o be-giyah hai ye dil ka dasht bhi
ik nahr ansuon ki yahan bhi bahai jaae
aajiz hain apne tala-e-bedar se bahut
har raat ham ko koi kahani sunai jaae
sab kuchh badal gaya hai magar log hain ba-zid
mahtab hi men surat-e-janan dikhai jaae
kuchh sagharon men zahr hai kuchh men sharab hai
ye masala hai tishnagi kis se bujhai jaae
shahron ki sarhadon pe hai sahraon ka hujum
kya majra hai aao khabar to lagai jaae
nazil ho jism o ruuh pe jab be-hisi ka qahr
us vaqt dosto ye ghazal gungunai jaae
Leave a Reply