Azhar Adeeb
lahje aur avaz men rakkha jaata hai
ab to zahr alfaz men rakkha jaata hai
mushkil hai ik baat hamare maslak ki
apne aap ko raaz men rakkha jaata hai
ik sho.ala rakhna hota hai siine men
ik sho.ala avaz men rakkha jaata hai
ham logon ko ḳhvab dikha kar manzil ka
raste ke aghaz men rakkha jaata hai
yahan to uḌte uḌte thak kar girne tak
chiḌiya ko parvaz men rakkha jaata hai
aḳhir-e-shab jo ḳhvab dikha.i dete hon
‘az.har’ un ko raaz men rakkha jaata hai
Leave a Reply