Jan Kashmiri
sairab ho kabhi ye ḳhilaf-e-qayas hai
apni nazar ko pyaas to sahra ki pyaas hai
is men hai saari husn-o-mohabbat se dilkashi
ye ziist varna maut hi ka iqtibas hai
ye dekhne ki shai nahin mahsus kar ise
har phuul ke badan pe haya ka libas hai
matam-kunan hai shiddat-e-tufan ki mauj mauj
kashti miri Dubo ke samundar udaas hai
yuun lamha lamha chhalke mira jam-e-zindagi
bachche ke haath jaise labalab gilas hai
har aadmi banata hai qismat ke za.iche
har aadmi yahan to sitara-shanas hai
ash.ar kyon na mere hon ḳhushbu ki khetiyan
ai ‘jan’ ḳhak-e-pak jo fan ki asaas hai
Leave a Reply