ahmad-rizwan

Shab Dhale Gumbad-e-Asrar Mein Aa Jata Hai

shab Dhale gumbad-e-asrar men aa jaata hai

ek saaya dar-o-divar men aa jaata hai

main abhi ek havale se use dekhta huun

dafatan vo nae kirdar men aa jaata hai

yuun shab-e-hijr shab-e-vasl men Dhal jaati hai

koi mujh sa miri guftar men aa jaata hai

mujh sa divana koi hai jo tire naam ke saath

raqs karta hua bazar men aa jaata hai

jab vo karta hai nae Dhab se miri baat ko radd

lutf kuchh aur bhi guftar men aa jaata hai

dekhna us ko bhi padta hai miyan duniya men

samne jo yunhi be-kar men aa jaata hai

ek din qais se ja milta hai vahshat ke tufail

jo bhi is dasht-e-sukhan-zar men aa jaata hai

main kabhi khud ko agar DhunDhna chahun ‘ahmad’

dusra maariz-e-iz.har men aa jaata hai

More Poems

Leave a Comment