Andaz-E-Fikr Ahl-E-Jahan Ka Juda Raha

Ghani Ejaz

andaz-e-fikr ahl-e-jahan ka juda raha

vo mujh se ḳhush rahe to zamana ḳhafa raha

aalam hayat ka na kabhi ek sa raha

duniya men zindagi ka tamasha bana raha

tha har qadam pe apne aza.em ka imtihan

har gaam hadsat ka mahshar bapa raha

phulon ki ahd gul men tijarat to ḳhuub ki

puchhe koi ki daman-e-gulchin men kya raha

bar-e-garan tha mere liye arsa-e-hayat

jiine ka tere gham se bahut hausla raha

har fikr har amal ka hai niyyat pe inhisar

shaiḳh-e-haram bhi banda-e-hirs-o-hava raha

duniya amal ki raah men aage nikal ga.i

zahid to ḳhanqah men mahv-e-dua raha

ham laakh muskura.e tabassum ki oT se

soz-e-gham-e-hayat magar jhankta raha

‘ejaz’ ahl-e-jaur se nafrat rahi unhen

har zulm un ki bazm men lekin rava raha