Chashm-E-Khun-Khwar Abru-E-Khamdar Donon Ek Hain

chashm-e-khun-khvar abru-e-khamdar donon ek hain

hain juda lekin ba-vaqt-e-kar donon ek hain

bais-e-aram ye ne mojib-e-azar vo

chashm-e-vahdat men hi gul aur khaar donon ek hain

iltiyam-e-zakhm-e-dil ke haq men gar kiije nigah

sabza-e-khat marham-e-zangar donon ek hain

halat istighna ki jis ke haath aai hai yahan

us ke nazdik andak o bisyar donon ek hain

mere us ke go judai aa gai hai darmiyan

jis ghadi baham hue do-char donon ek hain

jo na maane us ko ashiq ho ke us pe dekh le

abru-e-khamdar aur talvar donon ek hain

kya kahun main is ko ankhon ne diye hain jo fareb

fann-e-makkari men ye makkar donon ek hain

jo hai kaaba vo hi but-khana hai shaikh o barhaman

is ki nahaq karte ho takrar donon ek hain

ye nahin kahne ka ‘joshish’ hoga jo sahib-e-dimagh

zulf-e-yar o nafa-e-tatar donon ek hain

Leave a Comment