Ja Pahunchte Hain Sar-E-Dar Qaza Se Pahle

jā pahuñchte haiñ sar-e-dār qazā se pahle

kitne mansūr anal-haq kī sadā se pahle

husn-e-tanzīm ko kahte haiñ tarastī hī rahī

kahkashāñ mere nuqūsh-e-kaf-e-pā se pahle

sochtā huuñ ki kabhī maiñ ne sunī hai ki nahīñ

koī āvāz dil-e-naġhma-sarā se pahle

thā ġham-e-zīst magar kab thā shu.ūr-e-ġham-e-zīst

ahl-e-dil ahl-e-nazar ahl-e-vafā se pahle

qīmat-e-dār-o-rasan ham ne adā kī ‘nashtar’

jurm koī na kiyā jurm-e-vafā se pahle

Leave a Comment