ja pahunchte hain sar-e-dar qaza se pahle
kitne mansur anal-haq ki sada se pahle
husn-e-tanzim ko kahte hain tarasti hi rahi
kahkashan mere nuqush-e-kaf-e-pa se pahle
sochta huun ki kabhi main ne suni hai ki nahin
koi avaz dil-e-naghma-sara se pahle
tha gham-e-zist magar kab tha shu.ur-e-gham-e-zist
ahl-e-dil ahl-e-nazar ahl-e-vafa se pahle
qimat-e-dar-o-rasan ham ne ada ki ‘nashtar’
jurm koi na kiya jurm-e-vafa se pahle
Leave a Reply