Nabeel Ahmad Nabeel
ham ko ye Dar hai ki imkan kisi aur ka hai
ya.ani vo shaḳhs nigahban kisi aur ka hai
ye jo har lahza dhaḌakte hain mire siine men
dil kisi aur ka arman kisi aur ka hai
gha.ebana yahi samjha vo faqat mera hai
jab mila to laga nadan kisi aur ka hai
dastaken sun ke hi andaza hua tha ham ko
vo hamara nahin mehman kisi aur ka hai
hakim-e-sham ki bai.at se khula hai mujh par
taḳht par ma.ani-e-qur.an kisi aur ka hai
ham musafir hain to jaana hai kahin aur hamen
ghar kisi aur ka saman kisi aur ka hai
ham yunhi qarz chukate rahe anjane men
kaash ham jante tavan kisi aur ka hai
bandh kar sar pe kafan kuud paḌe hain jis men
jang hai ghair ki maidan kisi aur ka hai
ruḳh vo rakhta hai ba-zahir miri janib lekin
vo to mera nahin sultan kisi aur ka hai
main huun na-ḳhush ki ḳhizan aan paḌi hai be-vaqt
baghban ḳhush hai ki nuqsan kisi aur ka hai
umr-bhar ham ne pilaya hai jinhen apna lahu
vo baharen vo gulistan kisi aur ka hai
ye makan kis ki virasat hai hamen kya malum
sahn apna hai to dalan kisi aur ka hai
sehn-e-gulshan se nikal jaane ka mera shaha
main samajhta raha elaan kisi aur ka hai
karvan luTne ka us ko to nahin dard ‘nabil’
vo samajhta hai ki nuqsan kisi aur ka hai
yuun bhi mahrum hain ham rang se ḳhushbu se ‘nabil’
phuul apne hain to gul-dan kisi aur ka hai
Leave a Reply