Krishn Bihari Noor
ruk gaya aankh se bahta hua dariya kaise
gham ka tufan to bahut tez tha Thahra kaise
har ghaḌi tere ḳhayalon men ghira rahta huun
milna chahun to milun ḳhud se main tanha kaise
mujh se jab tark-e-ta.alluq ka kiya ahd to phir
muḌ ke meri hi taraf aap ne dekha kaise
mujh ko ḳhud par bhi bharosa nahin hone paata
log kar lete hain ghairon pe bharosa kaise
doston shukr karo mujh se mulaqat hui
ye na puchho ki luTi hai miri duniya kaise
dekhi honTon ki hansi zaḳhm na dekhe dil ke
aap duniya ki taraf kha ga.e dhoka kaise
aap bhi ahl-e-ḳhirad ahl-e-junun the maujud
luT ga.e ham bhi tiri bazm men tanha kaise
is janam men to kabhi main na udhar se guzra
teri rahon men mire naqsh-e-kaf-e-pa kaise
aankh jis ja pe bhi paḌti hai Thahar jaati hai
likhna chahun to likhun tera sarapa kaise
zulfen chehre se haTa lo ki haTa duun main ḳhud
‘nur’ ke hote hue itna andhera kaise
Leave a Reply