daur-e-ḳhizan men jashn-e-baharan dikha.i de
ab chaak chaak apna gareban dikha.i de
kab tak rahenge sahil-o-tufan ke darmiyan
kab tak ye zindagi hamen zindan dikha.i de
mere ḳhuda saza-o-jaza ab yahan bhi ho
ye sarzamin bhi adl ka unvan dikha.i de
is daur-e-gumrahi ki zarurat hai nuuh ki
sahil-ba-dast phir vahi tufan dikha.i de
‘manzar’ main thak chuka huun yahi DhunDte hue
is daur-e-na-shanas men insan dikha.i de
Leave a Reply