Manzar Tamam Aaj Tak Aankhon Pe Bojh Hain

manzar tamām aaj tak āñkhoñ pe bojh haiñ

jitne bhī ḳhvāb haiñ mirī palkoñ pe bojh haiñ

utregā chāñd to mirī bhar aa.egī ye aañkh

taare falak se TuuT kar rātoñ pe bojh haiñ

sochoñ pe naqsh haiñ vo jo pal the visāl ke

dukh hijr ke tamām hī lamhoñ pe bojh haiñ

bāteñ us ek yaad kī bātoñ kā husn haiñ

yādeñ us ek yaad kī yādoñ pe bojh haiñ

‘najma’ kahīñ bhī jhuuT kā jin par gumān ho

aise tamām lafz hī sheroñ pe bojh haiñ

Leave a Comment