jab kabhi nam-e-mohamad lab pe mere aa.e hai
lab se lab milte hain jaise dil se dil mil jaa.e hai
jab koi ghuncha chaman ka bin khile murjha.e hai
kya kahen kya kya chaman valon ko rona aa.e hai
koi kah deta ki ab kaahe ko qasid aa.e hai
zo.af se bimar ko uTTha na baiTha jaa.e hai
ho na ho kuchh baat hai tab ji mira ghabra.e hai
aap aa.e hain na ḳhat hi bhej kar bulva.e hai
raat bhi rote kaTi hai din bhi guzra jaa.e hai
aane vaale kuchh nahin ma.alum kab se aa.e hai
tere divane pe aisi bhi ghaḌi aa jaa.e hai
dam-ba-ḳhud rah jaa.e hai socha na samjha jaa.e hai
ek din vo din the rone pe hansa karte the ham
ek ye din hain ki ab hansne pe rona aa.e hai
barq ko kya jaane kya zid hai nasheman se mire
chaar tinkon ki qasam vo bhi na dekha jaa.e hai
hijr ki raton men bhi tanha kahan rahta hai zehn
tum kabhi aa jaao ho, dushman kabhi aa jaa.e hai
ji men rakhte hain kahen bhi to kisi se kya kahen
shikva un ka yuun to lab par baar baar aa jaa.e hai
bigḌi ban jaati hai, ye sach hai magar ai ham-nashin
na-muradi ka bura ho, ji hi baiTha jaa.e hai
ik ghalat sajde se kya hota hai vaa.iz kuchh na puchh
umr bhar ki sab riyazat ḳhaak men mil jaa.e hai
aap ki ik zulf suljhane ko lakhon haath hain
meri gutthi bhi koi aa kar kabhi suljha.e hai
Leave a Reply