poet

Nargisin Aankh Bhi Hai Abru-E-Khamdar Ke Pas

nargisin aankh bhi hai abru-e-khamdar ke paas

dusri aur bhi talvar hai talvar ke paas

dushmanon ka miri qismat se hai qaabu mujh par

yaar ke paas hai dil yaar hai aghyar ke paas

yaad rakhna jo hui vaada-khilafi un ki

bistara aan jamega tiri divar ke paas

qaidi-e-zulf ki qismat men hai rukhsar ki sair

shukr hai baagh bhi hai murgh-e-giraftar ke paas

chehra bhi barq bhi dil lene men gesu bhi bala

ek sa moajaza hai kafir o din-dar ke paas

ghair be-jurm hain aur main huun vafa ka mujrim

kaun aata bhala mujh se gunahgar ke paas

qabr men soenge aram se ab baad-e-fana

aaega khvab-e-adam dida-e-bedar ke paas

us ki kya vajh mire hote vahan kyuun na rahen

kyuun rahe zulf-e-siyah aap ke rukhsar ke paas

hoshiyari se ho ‘parvin’ chaman-e-husn ki sair

daam aur daana hain donon rukh-e-dil-dar ke paas

More Poems

Leave a Comment