Mujhe Wo Gham Hai Ki Sari Zamin Rone Lage

mujhe vo ġham hai ki saarī zamīn rone lage

jo ashk poñchh duuñ to āstīn rone lage

tumheñ pata hai maiñ aisī jagah bhī hañs aayā

jahāñ pe zabt ke sab māhirīn rone lage

madārī jāntā thā āḳhirī tamāshā hai

so khel aisā kiyā nāzirīn rone lage

tire laboñ pe udāsī thī ek lamhe ko

tirī hañsī ke sabhī shā.eqīn rone lage

kuchh aise qaid kiyā hai gharoñ meñ qudrat ne

makān hañsne lage aur makīn rone lage

Leave a Comment