Najma Shaheen Khosa
ḳhushiyon ka rasta go baḌa muḳhtasar raha hai
lekin ye dukh sada se mira ham-safar raha hai
us ki ada pe shayad rone lage falak bhi
va.adon se apne kaise ab vo mukar raha hai
kaisi bahar hai ye kaisa hai vasl-e-mausam
Tahni se TuuT kar jo rah men bikhar raha hai
vo ja chuka hai to phir us se gila bhi kyunkar
kab saath is jahan koi umr bhar raha hai
ḳhushbu ki aur ḳhushi ki ummid kya karen ab
jab andhiyon ki zad men dil ka nagar raha hai
dil khol kar hain barsin phir se hamari ankhen
‘shahin’ hijr-e-mausam phir se nikhar raha hai
Leave a Reply