ba-har-unvan mohabbat ko bahar-e-zindagi kahiye
qarin-e-maslahat hai us ke har gham ko khushi kahiye
jahan-sazon ko farzana ham ahl-e-dil ko divana
zamana to bahut kahta raha ab aap bhi kahiye
ba-unvan-e-digar phir ham se qaaem kar liya tum ne
vo ik gahra taalluq jis ko tark-e-dosti kahiye
samajh kar sang-e-rah-e-shauq thukrata huun manzil ko
kamal-e-agahi kahiye ise ya gumrahi kahiye
shab-e-mahtab men akasr fazaon se barasta hai
tilism-e-naghmagi aisa ki jis ko khamushi kahiye
main akasr sochta huun teri be-payan navazish ko
ada-e-khas kahiye koi ya bas sadgi kahiye
bhari mahfil se bhi tishna hi laut aai nazar apni
khud-agahi samajh liije ise ya khud-sari kahiye
Leave a Reply