ishq karo to ye bhi socho arz-e-saval se pahle
hijr ki puuri raat aati hai subh-e-visal se pahle
dil ka kya hai dil ne kitne manzar dekhe lekin
ankhen pagal ho jaati hain ek khayal se pahle
kis ne ret udaai shab men ankhen khol ke rakkhin
koi misal to hona us ki misal se pahle
kar-e-mohabbat ek safar hai is men aa jaata hai
ek zaval-asar sa rasta bab-e-kamal se pahle
ishq men resham jaise vadon aur khvabon ka rasta
jitna mumkin ho tai kar len gard-e-malal se pahle
Leave a Reply