pahle muft men pyaas baTegi
ba.ad men ik-ik buund bikegi
kitne hasin ho masha-allah
tum pe mohabbat ḳhuub jachegi
zalim bas itna batla de
kya rone ki chhuT milegi
aaj to patthar bandh liya hai
lekin kal phir bhuuk lagegi
main bhi pagal tu bhi pagal
ham donon ki ḳhuub jamegi
yaar ne paani pher diya hai
ḳhaak hamari ḳhaak uḌegi
duniya ko aise bhulunga
duniya mujh ko yaad karegi
Leave a Reply