Rauf Raheem
haram men vo nahin lutf jo halal men hai
ki murgh-o-mahi ki lazzat hamari daal men hai
fasad jo bhi karata hai firqa-varana
vo bheḌiya hai magar aadmi ki khaal men hai
hai iḳhtiyar ḳhayalon men chahe jo bhi karen
maza jo hijr men hai vo kahan visal men hai
mizah-o-tanz ka me.aar hai bahut uncha
hai zehn-o-fikr ki pasti jo ibtidal men hai
na jaane ye mira ghar hai ki gham-kada koi
main ranj men huun miri ahliya malal men hai
zamana chand sitaron se mutma.in hi nahin
hamari sha.iri aTki hui jamal men hai
gharibi kaise haTegi batao netao
gharib uljha hua bas isi saval men hai
kalal luTTi ka qaa.il hai jaam ka saaqi
ye farq zarf ka saaqi men aur kalal men hai
nahin hai bahr men be-vazn hai ‘rahim’ magar
hamari sha.iri sur men hai aur taal men hai
Leave a Reply