Poet
ye zindagi to bahut kam hai dosti ke liye
kahan se vaqt nikalta hai dushmani ke liye
ye aati jaati hui saans zindagi ke liye
ik imtihan-e-musalsal hai aadmi ke liye
ye ahd-e-nau ka andhera are ma.az-allah
taras rahe hain charagh apni raushni ke liye
unhen gulon ka tabassum to dekh lene do
tamam-umr jo tarsa kiye hansi ke liye
ye ahl-e-hosh mire raste se haT jaa.en
bahut hai mera junun meri rahbari ke liye
koi ruke ki chale gir paḌe ki thak jaa.e
guzarta vaqt Thaharta nahin kisi ke liye
kise ḳhabar thi ki jal ja.ega chaman ‘sharib’
charagh ham ne jala.e the raushni ke liye
Leave a Reply