haqiqaton se kabhi inhiraf mat kiije
qusur jis ka ho us ko muaaf mat kiije
kisi buzurg ke chehre pe kuchh nahin likkha
adab to kijiye us ka tavaf mat kiije
ḳhata ho aap ki to kijiye ise taslim
ḳhata na ho to kabhi e’tiraf mat kiije
muahida ho ta.alluq ho inkisari ho
kabhi mizaj ke apne ḳhilaf mat kiije
vo ghar ka raaz ho ya doston ki baten hon
kisi pe un ka kabhi inkishaf mat kiije
ghazal isharon kinayon ka naam hai ‘gauhar’
ghazal men baat koi saaf saaf mat kiije
Leave a Reply