jaan niklegi miri jaan badi mushkil se
hogi mushkil miri asan badi mushkil se
vo mire ghar rahe mehman badi mushkil se
raat nikle mire arman badi mushkil se
ankhen talvon se malin le ke qadam ankhon par
raah par aae nigahban badi mushkil se
tha bahut un ko gilauri ka uthana mushkil
dast-e-nazuk se diya paan badi mushkil se
badh ke darban ne liya aaj bhi daman mera
kal chhudaya tha gareban badi mushkil se
sohbat-e-bad se bachane ka bataya sab haal
aaj maane mire ehsan badi mushkil se
zulm ko lutf se taabir karenge dam-e-hashr
jaur se honge pasheman badi mushkil se
koi kafir ho jo kal jaae su-e-dair-e-butan
ki bacha aaj hi iman badi mushkil se
na rahe main ne kaleje men jo rakhna chaha
dil men thahre tire paikan badi mushkil se
duur abhi manzil-e-maqsud hai kaale koson
kuchh hue qata bayaban badi mushkil se
maan lete hain vo mushkil se bhi mushkil koi baat
kabhi asan se bhi asan badi mushkil se
mai bahut ruk ke mire halq se utre dam-e-naza
abhi mushkil hui asan badi mushkil se
be-shab-e-vasl ye andaz nikalte hi nahin
zulf hoti hai pareshan badi mushkil se
dhaar talvar ki thi jada-e-barik na tha
hai hua hashr ka maidan badi mushkil se
rahte hain aise hi insan farishte ban kar
aadmi bante hain insan badi mushkil se
dil-e-bismil men kuchh is tarah hue the paivast
tuut kar nikle hain paikan badi mushkil se
yahi andaz yahi vaza jo rakkhoge ‘riyaz’
log samjhenge musalman badi mushkil se
Leave a Reply