qatl ushshaq kiya karte hain
but kahan khauf-e-khuda karte hain
sar mira tan se juda karte hain
dard ki aap dava karte hain
atish-e-gham ne magar phunk diya
dil se shole jo utha karte hain
jama-e-surkh tira dekh ke gul
pairahan apna qaba karte hain
khuun rote hain chaman men bulbul
ham gulon se jo hansa karte hain
kham-e-abru-e-sanam ko dekhen
ham ye kaabe men dua karte hain
apne saaqi ko shab-e-furqat men
paani pi pi ke dua karte hain
roz do-char ka khuun karta hai
dast-o-pa surkh raha karte hain
mar gae par hadaf-e-tir hai khaak
ja-ba-ja tode bana karte hain
dahan-e-zakhm se ham qatil ke
tegh ko chuum liya karte hain
shor-e-mahshar se daren kya ashiq
aise hangame hua karte hain
hote hain dil men nihayat nadim
khuun jo be-jurm kiya karte hain
mehndi malne ke bahane qatil
kaf-e-afsos mala karte hain
evaz-e-bada gham-e-saqi men
khun-e-dil apna piya karte hain
paanv tak haath na pahuncha us ki
haath haihat mala karte hain
jo hamen bhuul gaya hai zalim
us ko ham yaad kiya karte hain
na-tavani ne diye par ham ko
jivan-e-par-e-kah uda karte hain
ham bane chand ke haale ‘goya’ hain
gird us mah ke raha karte hain