Poet
puchhte hain haal taḌpane ke ba.ad
ye karam hai har sitam Dhane ke ba.ad
gham ke saa.e se mila hai dil ko nuur
bijli kaundi hai ghaTa chha jaane ke ba.ad
ruḳh to kashti ka hai sahil ki taraf
dekhiye kya biite Takrane ke ba.ad
allah allah khinchna daman-e-dil
ziist ke kanTon men uljhane ke ba.ad
mil saka hai un ke gham ka kuchh maza
bahjat-e-kaunain Thukrane ke ba.ad
haa.e vo bebak gharat-gar nigah
jis ne luuTa dil ko chaunkane ke ba.ad
barq-vash jalva bhi koi jalva hai
aah ye Dhalkana tarsane ke ba.ad
toḌ hi Daalo dil-e-kam-baḳht ko
joḌne baiThe ho darkane ke ba.ad
aur bhaḌkate ho is paani se aag
ro rahe ho mujh ko sulgane ke ba.ad
Leave a Reply