daur-e-falak jab dohrata hai mausam-e-gul ki raton ko
kunj-e-qafas men sun lete hain bhuli-bisri baton ko
reg-e-ravan ki narm tahon ko chhedti hai jab koi hava
suune sahra chikh uthte hain aadhi aadhi raton ko
atish-e-gham ke sail-e-ravan men ninden jal kar raakh huiin
patthar ban kar dekh raha huun aati jaati raton ko
mai-khane ka afsurda mahaul to yunhi rahna hai
khushk labon ki khair manao kuchh na kaho barsaton ko
‘nasir’ mere munh ki baten yuun to sachche moti hain
lekin un ki baten sun kar bhuul gae sab baton ko