vo shakl vo shanaḳht vo paikar ki aarzu
patthar ki ho ke rah gai patthar ki aarzu
chhat ho falak to ḳhaak uḌane ko paanv men
sahra men khinchti hai hamen ghar ki aarzu
zaḳhmi kiye hain paanv kabhi laai raah par
kab kaun jaan paaya hai Thokar ki aarzu
apni giraft men liye uḌta phire kahin
parvaz ko hai kab se usi par ki aarzu
rahti hai mujh men kab se kunvari hai aaj tak
ik aarzu ke apne svayambar ki aarzu
‘akhilesh’ kab bujhi hai havas ki shadid pyaas
dariya tamam pi le samundar ki aarzu
Leave a Reply