Aftab Iqbal Shamim
naslen jo andhere ke mahazon pe ladi hain
ab din ke katahre men khata-var khadi hain
be-nam si avaz-e-shaguft aai kahin se
kuchh patiyan shayad shajar-e-shab se jhadi hain
niklen to shikaston ke andhere ubal aaen
rahne do jo kirnen miri ankhon men gadi hain
aa duub! ubharna hai tujhe agle nagar men
manzil bhi bulati hai saliben bhi khadi hain
jab paas kabhi jaaen to pat bhed len khat se
kya ladkiyan sapne ke darichon men khadi hain
kya raat ke ashob men vo khud se lada tha
aine ke chehre pe kharashen si padi hain
khamoshiyan us sahil-e-avaz se aage
patal se gahri hain, samundar se badi hain
Leave a Reply