Dinesh Kumar
kitab-e-zist se kuchh iqtibas tasviren
ḳhushi ke lamhon men detin miThas tasviren
akele-pan bhi hamara ye duur karti hai
ki rakh ke dekho zara apne paas tasviren
kuchh aise rang bharo jo samay se utre nahin
ye mu-qalam se karen iltimas tasviren
ḳhuda ke paas ga.e jab se valdain mire
miri hayat ki hai bas asaas tasviren
sulagti ret pa sagar ka aks bhi dikhta
lagati dekhiye kya kya qayas tasviren
guzishta vaqt men rahna ‘dinesh’ chhoḌ bhi de
na baar baar tu ab dekh udaas tasviren
Leave a Reply