Ramz Azimabadi
kisi bhi moḌ pe roka na gumrahi se mujhe
koi gila bhi nahin apni zindagi se mujhe
sabhon se milta huun begana-e-talab ho kar
na dosti se gharaz hai na dushmani se mujhe
safar se pahle zaruri hai mudda.a-e-safar
pata chala ye sitaron ki kajravi se mujhe
faqir-e-shahr to huun main gada-e-rah nahin
karam ki bhiik na de aisi be-ruḳhi se mujhe
mire jilau men chalega samundaron ka jalal
na rok pa.ega koi shanavari se mujhe
rah-e-hayat men kanTon ne mehrban ho kar
bacha liya hai azab-e-shaguftagi se mujhe
kisi se mil ke bichhaḌne ki jab ghaḌi aa.i
ghaḌi se ho ga.i nafrat usi ghaḌi se mujhe
andheri raat men dekha hai mash.alon ka julus
Dara diya hai siyasat ne raushni se mujhe
miri ana ne sabaq de ke ḳhud-parasti ka
chhuḌa diya hai zamane ki bandagi se mujhe
fareb-ḳhurda-e-tahrik-e-adamiyat huun
vafa ki aas nahin ‘ramz’ aadmi se mujhe
Leave a Reply