Mirza Altaf Husain Alim Lucknowi
kahna na maana kucha-e-qatil men rah gaya
achchha hua jo dil kisi mushkil men rah gaya
kya puchhte ho aise musafir ki sarguzisht
jis ko ki dil bhi chhoḌ ke manzil men rah gaya
nikla tha ban sanvar ke bahut chaudhvin ka chand
phir bhi vo tere ruḳh ke muqabil men rah gaya
qatil ne tegh myaan men kuchh soch kar rakhi
thoḌa sa jab ki dam tan-e-bismil men rah gaya
dirham mila bhi mun.im-e-kaj-ḳhulq se agar
ik daagh ban ke vo kaf-e-sa.il men rah gaya
itna bata de us ke uThane se fa.eda
tasvir ban ke jo tiri mahfil men rah gaya
kya jaane bahr-e-ishq ki halat vo bad-nasib
dam toḌ kar jo daman-e-sahil men rah gaya
fikr us ki ranj us ka ummid us ki kuchh na puchh
jo sar jhuka ke kucha-e-qatil men rah gaya
tabir-e-ḳhvab zulf-e-musalsal thi kya yahi
‘alim’ jakaḌ ke main jo salasil men rah gaya
Leave a Reply