Jan Kashmiri
umr bhar ziist ki mahkar se bach bach ke chala
dil jala raunaq-e-bazar se bach bach ke chala
be-suluki ne bura.i men bhi jaḌ pakḌi hai
kyon riya-kar riya-kar se bach bach ke chala
is qadar apne gunahon se aqidat hai mujhe
umr bhar sahab-e-kirdar se bach bach ke chala
meri kuTiya men ziya-bar hai bujhta sa diya
chand kyon rauzan-e-divar se bach bach ke chala
aa gaya vaqt ke aḳhir to shikanje men bhi vo
laakh jo vaqt ki raftar se bach bach ke chala
sar pe dastar liye phirte hain qamat se buland
main har ik sahab-e-dastar se bach bach ke chala
hausla kaise kare bhaa.i vo banne ka kahar
‘jan’ chiḌiyon ki jo chahkar se bach bach ke chala
Leave a Reply