asrarul-haq-majaz

Raat Aur Rail

phir chali hai rail station se lahrati hui

nim-shab ki khamushi men zer-e-lab gaati hui

Dagmagati jhumti siiti bajati khelti

vaadi o kohsar ki thanDi hava khati hui

tez jhonkon men vo chham chham ka surud-e-dil-nashin

andhiyon men menh barasne ki sada aati hui

jaise maujon ka tarannum jaise jal-pariyon ke giit

ek ik lai men hazaron zamzame gaati hui

naunihalon ko sunati mithi mithi loriyan

nazninon ko sunahre khvab dikhlati hui

thokaren kha kar lachakti gungunati jhumti

sarkhushi men ghungruon ki taal par gaati hui

naaz se har mod par khati hui sau pech-o-kham

ik dulhan apni ada se aap sharmati hui

raat ki tarikiyon men jhilmilati kanpti

ptriyon par duur tak simab jhalkati hui

jaise aadhi raat ko nikli ho ik shahi barat

shadyanon ki sada se vajd men aati hui

muntashir kar ke faza men ja-ba-ja chingariyan

daman-e-mauj-e-hava men phuul barsati hui

tez-tar hoti hui manzil-ba-manzil dam-ba-dam

rafta rafta apna asli ruup dikhlati hui

sina-e-kohsar par chadhti hui be-ikhtiyar

ek nagan jis tarah masti men lahrati hui

ik sitara tuut kar jaise ravan ho arsh se

rifat-e-kohsar se maidan men aati hui

ik bagule ki tarah badhti hui maidan men

jangalon men andhiyon ka zor dikhlati hui

rasa-bar-andam karti anjum-e-shab-tab ko

ashiyan men tair-e-vahshi ko chaunkati hui

yaad aa jaae purane devtaon ka jalal

un qayamat-kheziyon ke saath bal khati hui

ek rakhsh-e-be-inan ki barq-raftari ke saath

khandaqon ko phandti tilon se katrati hui

murgh-zaron men dikhati ju-e-shirin ka khiram

vadiyon men abr ke manind manDlati hui

ik pahadi par dikhati absharon ki jhalak

ik bayaban men charagh-e-tur dikhlati hui

justuju men manzil-e-maqsud ki divana-var

apna sar dhunti faza men baal bikhrati hui

chhedti ik vajd ke aalam men saz-e-sarmadi

ghaiz ke aalam men munh se aag barsati hui

rengti mudti machalti tilmilati hanpti

apne dil ki atish pinhan ko bhadkati hui

khud-ba-khud ruthi hui biphri hui bikhri hui

shor-e-paiham se dil-e-giti ko dhadkati hui

pul pe dariya ke dama-dam kaundti lalkarti

apni is tufan-angezi pe itrati hui

pesh karti biich naddi men charaghan ka saman

sahilon par ret ke zarron ko chamkati hui

munh men ghusti hai surangon ke yakayak daud kar

dandanati chikhti chinghadti gaati hui

aage aage justuju-amez nazren Dalti

shab ke haibatnak nazzaron se ghabrati hui

ek mujrim ki tarah sahmi hui simti hui

ek muflis ki tarah sardi men tharrati hui

tez-e-raftar ke sikke jamati ja-ba-ja

dasht o dar men zindagi ki lahar daudati hui

Daal kar guzre manazir par andhere ka naqab

ik naya manzar nazar ke samne laati hui

safha-e-dil se mitati ahd-e-mazi ke nuqush

haal o mustaqbil ke dilkash khvab dikhlati hui

Dalti be-his chatanon par haqarat ki nazar

koh par hansti falak ko aankh dikhlati hui

daman-e-tariki-e-shab ki udati dhajjiyan

qasr-e-zulmat par musalsal tiir barsati hui

zad men koi chiiz aa jaae to us ko piis kar

irtiqa-e-zindagi ke raaz batlati hui

zoam men peshani-e-sahra pe thokar marti

phir subuk-raftariyon ke naaz dikhlati hui

ek sarkash fauj ki surat alam khole hue

ek tufani garaj ke saath Darati hui

ek ik harkat se andaz-e-baghavat ashkar

azmat-e-insaiyat ke zamzame gaati hui

har qadam par top ki si ghan-garaj ke saath saath

goliyon ki sansanahat ki sada aati hui

vo hava men saikadon jangi duhal bajte hue

vo bigul ki jan-fazan avaz lahrati hui

al-gharaz udti chali jaati hai be-khauf-o-khatar

shair-e-atish-nafas ka khuun khaulati hui

More Poems

Leave a Comment