mira vajud hai ik naqsh-e-ab ki surat
shikast jis ka muqaddar hai ḳhvab ki surat
bikhar na ja.un faza men varaq varaq ho kar
hava ki zad men huun kohna kitab ki surat
tanav had se baḌhega to TuuT ja.enge
dilon ke rabte tar-e-rabab ki surat
kisi bhi lamhe nikal ja.unga hava ki tarah
mira badan hai hisar-e-habab ki surat
darun-e-sina koi chiḳhta hai sham-o-sahar
ye qahqahe to hain ruḳh par naqab ki surat
ghurur-e-vaqt se nashsha hua siva ‘sabir’
miri ana thi purani sharab ki surat
Leave a Reply